Али-Бердуковское сельское поселение

Хьэгъундыкъуей къуажэм щызэхэтащ Къандур саугъэтым и лауреат, Къэрэшей-Черкес Республикэм и цIыхубэ усакIуэ, республикэм щIыхь зиIэ и егъэджакIуэ Бемырзэ Мухьэдин и цIэкIэ къызэрагъэпэща фэеплъ зэпеуэ. Абы хэтащ къуажэдэс щIалэгъуалэр, курыт еджапIэхэм щеджэ класс нэхъыжьхэм хэсхэр.

ЖыIэпхъэщи, мы зэпеуэр илъэс ещанэ хъуауэ къуажэм щокIуэкI. Мухьэдин иригъэджа щIалэгъуалэм я хьэрычэткIэ зэхаублауэ, усакIуэр къыщалъхуа махуэм ирихьэлIэу, къуажэ щIалэгъуалэм я спорт зэфIэкIхэмкIэ зэрызапщытэ. Мы илъэсми спорт утыкум щызэпэщIэтащ еджакIуэ ныбжьыщIэхэми, щIалэгъуалэми, курыт ныбжьым итхэми къабгъэдэкIа  гупхэр.

— Хабзэ зэрытхуэхъуауэ, илъэс къэси мы зэпеуэр къызыдогъэпэщ. Ди гуапэщ щIалэгъуалэм я нэхъыжьхэр ягъэлъапIэу, хьэрычэт дахэкIэ зэхыхьэу къызэрыгъуэгурыкIуэр. Шэч зыхэмылъщи, Мухьэдин и гъащIэкIи, гуащIэкIи, цIыхугъэкIи псэухукIэ къилэжьащ нобэ ямыгъэкIуэду кIэлъызэрахьэ фэеплъ нэхур. Къуажэдэс щIалэгъуалэми «тлъэкIымкIэ ди егъэджакIуэм и цIэр дгъэлъэпIэнщ» жэуэ утыкум къыщихьэкIэ, ар дэрэжэгъуэ къозыт Iуэхугъуэщ,— игъэбелджылащ Хьэгъундыкъуей къуажэ администрацэм и Iэтащхьэ Иуан Руслан.

Утыкум щызэпэщIэта гупхэм ящыщу белджылы хъуащ джэгукIэ IэзагъкIэ къыхэжаныкIахэр. ИкIи, Бемырзэ Мухьэдин и цIэкIэ илъэс къэси зэпеуэм щызэIэпах фэеплъ кубокыр абыхэм хуагъэфэщащ.

Къуажэ администрацэм къыбгъэдэкIыу япэ увыпIэр къэзылъэща гупищым фIыщIапщIэу ахъшэ, щIыхь тхылъ хуагъэфэщащ.

Япэ увыпIэмрэ кубокымрэ къилъэщащ «Iэдииху» командэм. ЕтIуанэ увыпIэр «Мадрид» -м ихьащ. Ещанэр – «Нарт»гупым зыIэрагъэхьащ.

Я цIэр фIыщIэкIэ ираIуащ ныбжькIэ нэхъ ныбжьыщIэ дыдэ гупымрэ спортсмен щхьэхуэхэмрэ. Апхуэдэщ етIуанэ увыпIэр къэзылъэща «Мадрид»-мрэ абы хэт Бетыгъуэн Муратрэ.

— Ди гуапэщ Мухьэдин и цIэр тлъэкIкIэ зэрытIэтыфыр. ИлъэсищкIэ узэIэбэкIыжмэ, мы зэпеуэр къыщедгъажьэми ди мурад пэрыту щытар ди егъэджакIуэр, къуажэми, Хэкуми и цIэр зыIэта усакIуэр, ди къуажэдэс цIэрыIуэр щIэблэм щыдмыгъэгъупщэнращ.

И усэхэр зэрызэрагъащIэм, и фэеплъыр зэрахъумэм къыщымынэу, щIэблэм и къарурэ гуащIэрэ зыхалъхьэ зэпеуэ хэтмэ, Мухьэдин и фэеплъыр нэхъ къалъыIэсыну къэтлъытащ, — жиIащ зэпеуэр зи жэрдэм къикIахэм ящыщ Бетыгъуэн Аслъэн.

ЩОХЪУЖЬ Люсанэ